本港前冠軍騎師潘頓早前宣佈，太太Nicole又有喜，自己將榮升第二任爸爸，最新消息係據知經檢查後，初步知道今胎係BB仔，預產期明年3月，加埋就快兩歲嘅囡囡Roxy，就會湊成一個「好」字，意頭好到極。
潘頓話Nicole將留在香港生BB，唔會返祖家澳洲，佢就可以一邊跑馬，一邊照顧屋企人，而囝囝名字仲未諗到，潘頓話同老婆傾了幾次，大家未有共識，同Roxy出世嗰陣好唔同，佢解釋男仔名比女仔名難改，因為佢想囝囝有男子氣概，亦唔想名字太平凡普通，唯有花多少少時間諗一諗，仲叫各位馬迷網友幫手畀意見。
至於今期(18日)賽事，潘頓座騎中包括身價850 萬的初出馬「京京千里」，列陣第二場四班1200米草地，早在上季尾潘頓已多次親操教馬，專登等到今季先上陣，畀馬兒有足夠時間成長。潘頓直言今場水準普通，「京京千里」本身試閘走勢理想，已有爭勝水準，加上對手中晨課見進步嘅「航天勇將」腳傷退出，對「京京千里」更加有利。