去旅行，撞正晨早機到，又或晚機走，偏偏未到或者過咗酒店入住時間，真係好頭痕。自己去玩還可行街打發時間，商務旅客就最慘，其實只想搵個地方梳洗或唞唞，唔通真係搞到要住時鐘酒店？
好在，約四年前左右，不少高級酒店發現客人退房之後、入住之間，約11am至5pm中間的空檔，酒店幾乎無人使用，於是推出日間使用計劃（Day Use Plan），讓顧客在這段時間可斷鐘計入住。當初以機場酒店為主，後來許多市內的四、五星酒店都加入。不過未必間間都在網站列明，部份要客人打電話去問才知道。坊間便出現了幾個訂房網站，除了方便用戶搜尋，更標榜以下好處：
1) 日間入住，比正價平最多七成半
2) 不收取定金
3) 取消訂房毋須罰錢
4) 部份入住時間相當有彈性，8am至8pm之間可選
當中以法國網站Day Use選擇最多，單是巴黎就有400多間酒店可選，介面有齊酒店相、入住時間、折扣等，靚得來又易用。比利時的Between 9 and 5就以連鎖品牌為主，與Radisson Blu、Hilton、Sheraton等酒店合作。記者去巴黎時曾經試用過，訂完房立即收到確認電郵。我們再打去入住酒店查詢，發現網站收費跟酒店提供的day rate一樣，更難得沒收手續費。至於美國的Hotels by Day及英國的Day Break Hotels，雖然有會議室、spa可以預訂，但因初起步，兩者英美以外的地點比較少。
日間入住計劃打破過往死板的check-in時間，可謂方便不少。惟幾個網站目前都缺少亞洲城市選擇，日韓台完全欠奉，香港、曼谷、新加坡也只有三數間可揀，期望將來會有更多吧。
記者：甄俊宇
攝影：梁志永