民政事務局前局長曾德成舊年突然提早退休，政圈一直盛傳係同特首梁振英唔妥佢有關。噚日曾德成接受大佬立法會主席曾鈺成訪問時表明心迹，話自己唔係為做官而做官，又似暗寸CY話有人「上台容易、下台難」，之後又大講佛偈話自己退步原來是向前，席間唔知係咪因為政圈盛傳曾主席想選特首，曾德成仲同大佬講要量力而為、適當放下，莫非係暗示大佬唔好去馬？
暗寸CY上台容易下台難
商台噚日繼續播出曾主席訪問細佬嘅錄音，曾德成講番提早退休件事，強調自己並非為做官而做官，佢係想為香港、為港人做番啲嘢，至於完成唔到任期，佢反而話有人係上台容易、下台難，佢就剛剛相反，屬於上台難、下台容易嗰種。
之後曾德成講到以前參觀過一間佛寺，入面有首布袋和尚講插秧嘅詩，大家都知插秧嘅人係倒後行，但首詩入面有一句「退步原來是向前」，而佢正正抱呢種想法，所以係真真正正樂意提早退休嘅。
雖然大家唔知德成嘅退步代表佢有咩向前，不過曾鈺成退下主席後選唔選特首就備受關注，至於佢細佬會唔會用其他方式為香港做嘢？曾德成笑住話做人要量力而為，仲話佢同曾鈺成已經係長者，呢個時代已經唔需要中國已故總理周恩來嗰種鞠躬盡瘁嘅精神，所以要適當放下。鈺成聽到亦不禁邊笑邊話，佢都要認真考慮呢番道理。
李八方
mailto:[email protected]