由香港足球總會主辦、賽馬會贊助嘅2016香港賽馬會社區盃噚日上演兩神對壘，即係桂神隊大戰雷神隊，雙方鬥到難分難解，最後要射12碼決勝負，由桂神隊勝出。估唔到騎師踢波都好掂喎。
桂神隊同雷神隊都由現役騎師同足球名宿混合組成，30分鐘嘅比賽絕無冷場。開波冇耐桂神隊前鋒騎師羅理雅先拔頭籌，兩隊互有攻守，完場前5分鐘雷神隊憑羅素扳平，要射12碼決勝負。兩隊都派出騎師負責，結果雷神隊嘅祈普頓射失咗一球而輸4比3。雖然係一場激戰，但大家都係為慈善，事關馬會向三甲球隊提供獎金外，亦會撥30萬畀9支港超球隊，部份門票收益亦會捐畀慈善團體。