自從朱凱廸當選立法會議員之後，佢因為橫洲發展事件，除咗要擔心自己同家人安全，又要同官員開會；佢嘅選舉團隊一樣好忙，因為選舉完後仲有好多手尾要搞，其中一樣就係拆走選舉banner，有政黨會循環再用，亦有政黨索性丟棄，但朱凱廸團隊就另有環保同創意方法「活化」banner。
一條可以整4個
朱凱廸團隊係facebook貼文，話早前回收咗150條banner，佢哋決定唔好浪費，花啲心思同時間，將banner做成手挽袋，一條仲可以整4個！好多網民好鍾意佢哋嘅創意，留言叫佢哋拎出嚟義賣，幫到自己團隊又可以幫到有需要嘅人。