新亞校友、退休校長呂令意出席一個教育講座，講到佢十幾年前到拉斯維加斯旅行，曾參觀一個「竹博物館」，大開眼界。原來竹有好多品種，粗略啲講，初期生長嘅嫩竹，根部需要大量水份與時間，先至能茁壯成長。呂校長於是引申到教育小孩子像竹的孕育期，祖父母、父母與教師須耐心給予孩子養份，有耐性，不要操之過急，逼小孩子成為小天才。既然如此，子女長大後當知阿爺阿嫲阿公阿婆及父母之苦心，敬愛長輩，呂校長推動嘅「最敬愛祖父母選舉」又舉行嘞，正接受提名，九月三十日截止。
香港目前嘅幼兒教育情況令人擔心嘅地方，就是兩三歲小孩已經要學好多嘢，去到六七歲更加學習不停。左丁山見過一個中產家庭三歲女上午讀國際幼稚園（以英文及普通話教學），放學後就擒擒青換過校服去一間本地學券幼稚園上堂，唔通小孩全日唔會眼瞓疲倦？阿媽話唔會喎，慣咗就得。又見到一位富裕人家亦是如此，上午在九龍塘讀「名校幼稚園」，下午就由菲傭及司機接去另一間位於郊區嘅英童幼稚園，四歲就讀兩文三語，仲唔計學畫、學鋼琴，女的學芭蕾舞，男的學跆拳道，玩iPad，個個似天才。
在會所、酒店飲茶，往往見到不少父母自己做低頭族望住電話，男女小孩就對住iPad玩遊戲玩到不亦樂乎，全神貫注，動也不動，於是父母大讚仔女好乖，唔嘈吵。好嘞，世界衞生組織代表來港出席論壇，指小孩過早上網及使用電子產品，有害無益；港大研究咗六百至七百名四至五歲幼稚園學生使用電子產品，發現多變成沉迷，無父母疏導嘅話，學生升上小學後中文與數學成績甚差，甚至出現社交問題，驚未？
左丁山問沙田陳太平日點教孫，佢話禁止兩歲及三歲孫女睇iPad，限時睇BBC卡通學英語，日間以讀及講故事書為主，中英文故事書都有，呢番話令我左丁山想起以前在本欄寫過矽谷有一間特殊學校叫做Waldorf，吸引不少eBay、Google、Apple、Yahoo、HP嘅僱員送子女入學，科技公司僱員嘅下一代入呢間學校，竟然冇電腦用，上堂只會見到紙、筆、針線。課室完全不用螢光幕，更加冇手機、iPad、電子書之類。呢間學校嘅學生會唔會好落後呀？其他人驚啫，呢間學校嘅家長不少係電腦科學專家，你同佢定，呢類家長大概一早了解世衞及港大嘅研究發現，行先幾步咯，培育幼兒，快唔嚟嘅，欲速則不達，小孩太早識用iPad apps畫畫，邊有心機用鉛筆學素描呀！