當打工仔忙到一頭煙，社交網站出現一幅外籍長者悠然自得在田園準備嘆茶圖，圖中配字竟是：「未食lunch呀？我飲緊下午茶呀！」不禁嬲到想打爆Mon，然後再睇一幅：「今日天氣咁好，你哋返工一定好開心箒！」口中叫佢哋睇路，心中好想爆粗，不是對長者不敬，只是抒發對現實不滿而已。
這個facebook專頁叫「老友memes」，在立法會選舉後翌日（9月5日）成立，結集大量外籍長者逍遙相片，配上大量惡搞絕核字句，表達長者食住花生嘲諷年輕人的態度。例如長者傾向支持建制，年輕人傾向撐泛民或本土派，兩者政見不同，呢班「老友記」話：「你睇班後生又上網叫春，咪又係要養我哋。」、「一票不投你班垃圾廢青。」言詞辛辣，廢青如我頓時被嚇到毛管戙。新鮮出爐的港姐冠軍馮盈盈之前在網上用粗口評政治，呢班潮爆「老友記」都新鮮抽水：「你年少時講過粗口，依家老人院唔L收你喇！」盡顯憤怒老友記討厭粗口、愛站在道德高地責罵年輕人少不更事。專頁短短一星期已獲得過萬粉絲。
以為他們憤世嫉俗，想得罪全世界後生仔女，他們最近想跳出網絡，本周日辦一個聲稱是「全港首個設關愛座」的展覽「老友memes人生勝利展」，展出25至35幅作品，聲稱部份作品更從未在網上曝光，離奇歡迎廢青、憤青攜同老友記一同參觀，這是另類的跨代共融嗎？真是用心良苦。
至於版主是何方神聖，為何成立專頁，他們一概拒絕透露，淨係話自己：「老喇，個樣唔見得人，手手腳腳都謝晒皮。」而回覆記者短訊打字「打足十幾個鐘」，至於電話訪問，他們想低調，就表示：「你由班老友記自生自滅喇。」
老友memes人生勝利展
日期及時間： 9月18日12:00nn-6:00pm
地點：葵芳大連排道金豐工業大廈二期21樓M室「遊花園」
費用：全免
查詢：facebook專頁「老友memes」
記者：梁慧琳
圖片由受訪者提供
