今戰（18日）起莫雷拉停賽兩期，原本由他操開及騎開的馬要易配，其中第五場「甜統」及第六場「綠勇士」，上仗均大熱倒灶，兩匹摩廐馬熱身後今戰再跑同一路程，隨時一併名列前茅。第五場四班1400米，摩廐「甜統」上仗開鑼日大熱倒灶跑第三，今戰由潘頓接手，潘頓接手雷神馬匹特別落力，最近三駒取兩Ｗ一Ｑ（見表），頭馬包括大摩的「宇宙車神」。「甜統」上仗早段未能跟上步速，莫雷拉全程要力騎，相信與未熱身有關，結果姍姍來遲，以全場第二快末段追上保住季軍，今仗熱身後再出，可望像上季一樣，第二仗出賽即勝。事實上，「甜統」上季三歲已可在同程1400米輕勝，今季轉四歲更成熟，繼續原班跑好有利。第六場三班草地1200米的「綠勇士」，上仗開鑼日同程入到直路塞死完全冇跑過，所以跑第四亦被加了一分，此駒上季影相輸個頭俾86分「嘉福」而跑贏78分「乘勢好運」，現時評73分有水位。當雷神被罰停賽後，韋達第一時間過檔此駒操練，他連同場剛在其胯下跑第三的「肥仔」也放手，可見「綠勇士」在他心目中份量不輕，騎練有望繼上個賽日勝出「步步德」後，再次合作贏馬。