新民黨立法會候任議員容海恩嘅言論驚人，相信連日嚟嚇到葉劉淑儀個心都離一離，容海恩先後話自己喺選舉期間曾拜訪國安局，獲內地官員關心佢嘅選情，又話「腦細」葉劉淑儀選舉後去到中聯辦「令人感覺奇怪」。
教講德文「回答」
當容海恩被質疑點解成日喺選舉論壇答非所問時，佢竟然話好多前輩教佢「唔好直接答佢（對手）呀」，呢番話搞到連德國駐港總領事館都覺得相當有趣。
向來透過教德文字嚟諷刺時弊嘅德國駐港總領事館，噚日喺facebook專頁教人「回答」嘅德文點講，就係「beantworten」喇。德領館抵死教人「我沒有必要直接回答你的問題」嘅德文點樣講，跟住仲要畫咗個貌似容海恩嘅卡通女仔喺旁邊。有網民叫德國總領事介紹邊隻抽濕機好用，因為乜水都俾德國人抽乾晒喇。