加里夫巴利喺皇家馬德里嘅影響力雖然越嚟越大，但一哥始終係31歲嘅基斯坦奴朗拿度（C朗）。C朗周三喺歐聯F組分組賽完場前射入靚罰球扳平，協助衞冕嘅皇馬主場反勝佢母會士砵亭2:1，兼攞到個人職業生涯第550球，同時取代意大利名宿迪比亞路而成為歐聯罰球王。
倒戈士砵亭建功拒慶祝
皇馬挾住西甲開季三連勝強勢展開歐聯衞冕路，教練施丹仲排出「BBC」進攻組合，但主場對住士砵亭半場都入唔到波，仲喺48分鐘俾對手前鋒般奴施薩辛拿基偷雞射入而落後0:1。皇馬之後狂攻，但攻極都攻唔入，施丹仲喺67分鐘換走巴利同賓施馬，BBC中淨係留番C朗一個，卒之去到89分鐘靠C朗射入罰球追成1:1；去到補時四分鐘，占士洛迪古斯再助攻畀艾華路莫拉達頭槌破網，皇馬戲劇性反勝2:1。施丹賽後話：「我哋唔係場場波都要贏5:0。今場波我哋踢得好辛苦，但最終總算攞晒三分。」
歐聯罰球王壓迪比亞路
C朗呢個罰球除咗令皇馬起死回生，仲係佢職業生涯第550球；雖則咁重要同咁有意義，但士砵亭始終係佢母會，所以入波後都冇慶祝。傷癒復出後上陣兩場都有波入嘅C朗話：「呢球好重要，場波差唔多完，法定時間得番一分鐘，對手仲係一支好有鬥心嘅球隊。但我唔會慶祝入波，因我有今日全靠士砵亭，所以我非常尊重佢哋，佢哋仲時時刻刻喺我心中。」另外，呢球亦係C朗喺歐聯累積射入嘅第12個罰球，令佢超越入咗11個罰球嘅意大利名將迪比亞路，成為歐聯史上入最多罰球嘅球員。今夏為葡萄牙首奪歐國盃嘅C朗話：「家陣我喺皇馬踢得好開心，我唔止一次講過想喺呢度踢到掛靴，因為皇馬係我𠵱家最愛嘅球會。」