教練郎平喺里奧帶領中國女排重奪失落12年嘅冠軍，球迷梗係希望佢喺四年後嘅奧運繼續帶隊啦。當郎平喺周三同朱婷等女排成員去到杭州同球迷見面嗰陣，就有球迷起哄問佢會唔會喺東京奧運出現，雖然55歲嘅郎平冇正面回應，但都有點點頭暗示會留隊。至於中國女排二隊喺同日嘅亞洲盃分組賽，冇派出張常寧同龔翔宇兩位里奧冠軍成員上陣，仍然以直落三盤擊敗南韓。