如果話「我流緊中國人嘅血」呢句話係出自長期爭取中港民主嘅民主黨、支聯會成員把口，大家應唔會覺得驚訝，但呢句滿腔熱血嘅說話，竟然係出自叫人大範圍談港獨、不斷高喊打倒共產黨嘅熱血公民口中，仲要係啱啱當選嘅候任立會議員鄭松泰，相信大家都會覺得好亂，但事實就係咁殘酷。
「我流嘅係中國人嘅血」
近日有網民為鄭松泰同埋楊岳橋考古，搵番2005年兩人喺北京讀書時接受港台《鏗鏘集》訪問嘅片段。最具欣賞價值嘅當然係鄭松泰啦，佢出色嘅爆炸頭髮型、青澀嘅面孔相當有喜感，令人覺得𠵱家嘅佢相當靚仔。
不過佢嘅言論比起外表更出色，當年佢辭任議員助理到北大社會學系修讀碩士，受訪有感而發：「我流嘅係中國人嘅血，但係我又唔識唱國歌，但係咪識唱國歌嘅就係中國人呢？所以好矛盾。」今時今日喺熱血公民中，話自己流住中國人嘅血有冇違反黨紀呢？難怪有網民留言話「流中國人嘅血，俾熱狗知道，情何以堪」。
呢一集同時訪問咗公民黨楊岳橋（AY），2002年到北大法律系讀碩士嘅佢，講嘢風格、咬字同𠵱家冇乜變，但當年係白面書生，工黨趙恩來就留言話「人生充滿希望」。AY言談間似乎十分想貢獻祖國：「我一心諗住嚟北京，細個已經好想返嚟中國大陸睇吓、生活吓。」兩人當年睇嚟都係大中華膠，同今時今日香港年輕人講嘅自決、自主、抗共、港獨，似乎唔多夾。
李八方
mailto:[email protected]
