美國股市影響全球，紐約大跌的話，亞洲莫不跟隨，中國股民、憤青、反美人士唔鍾意都好，美帝資本主義霸權目前仍然牢不可破，上海深圳股市只能閂埋門自己炒，股市嘅「國家隊」就好似中國男子足球隊（國足隊），難以衝出亞洲，雖則中超富有到高薪聘請世界一級教練馬加夫、史高拉利及柏歷堅尼到中國任教，一副財大氣粗模樣。
中國話係有錢，但由於金融制度相對落後，不准沽空，只准買、不准賣，唔多唔少反映中國共產黨對真正自由市場有戒心，無信心，一定要操控先至安樂，於是咁就在金融市場永遠跟隨美帝指揮棒，即使大量北水南下，也難敵美帝放風加息。
特朗普已不再是難以預測嘅黑天鵝，而係搖身一變成為可以大搖大擺行入白宮嘅白天鵝。聽佢現在競選活動演講嘅政策，例如（一）在墨西哥美國邊境興建城牆，逼墨西哥政府付鈔；（二）向中國貨物大幅度提升入口關稅；（三）廢除或重新談判Nafta（北美自由貿易協議），唔再傾亞洲TPP，以後同美國講自由貿易協議唔使嚟；（四）炒聯儲局主席耶倫，鬧聯儲局極低息政策冇用；（五）向美國海外公司徵稅，逼佢地返回美國開廠開公司，將工作職位由海外帶回美國；（六）叫南韓日本在防衞方面向美國交保護費，否則食自己，大可自行開發核武器；（七）叫歐洲北大西洋公約盟國多分攤防衞費，減輕美國負擔。
以上各種政策，或者係競選時誇張誇大之詞，當選後可能面對現實，轉軚都未定，但特朗普說話太絕、太死，如不實行一啲諾言，好難向支持者交代，真的推行嘅話，勢必引發中美貿易戰、歐美貿易戰、中日韓軍備競賽，嚴重影響東北亞地區穩定，美國本身就要重新制定後耶倫之貨幣政策，股市遇到咁大變局，點會上升呀，唔大跌先至係奇蹟。屆時即使有北水南下，都幾難將港股推上高𥧌。內地股市去年暴跌後，完全無力重返滬綜指四千五百點，大家就知道一二。我地無厚愛於希拉莉呢位政壇狐狸，但起碼佢會穩定世界局勢，不會刻意製造世界混亂，facebook創辦人之一，Dustin Moskovitz捐款二千萬美元俾「反特朗普」政治組織，務求保送希拉莉入白宮，相信就係呢個原因。