成長於煲蠟年代的小朋友，總不懂螢光棒除了多舊膠外，到底有咩好玩。而五、六十年代成長的小朋友，未興煲蠟，卻有個如Pokemon Go浩大的遊戲慶中秋－收集月餅紙。
「小時候沒娛樂，一到中秋節就到處去拿月餅紙。」拿來作甚？「沒甚麼，就摺飛機。」那時香港滿街大酒樓，有自己的餅店，農曆七月起，就開始宣傳中秋月餅。自認「乜都儲」的收藏家劉銓登(Ricky)，會由中環屋企出發，經高陞茶樓、蓮香酒樓、回灣仔龍門酒樓、雙喜酒樓、乘小輪過海到得如茶樓、瓊華酒樓、龍鳳大酒樓到去深水埗，到每家酒樓餅店收集宣傳月餅會及月餅的宣傳單，一玩就一日。那時中秋，酒樓都掛上大大幅中秋花牌，還有歷史故事走馬燈：「好多人企喺度睇十幾二十分鐘都唔願走㗎！」
他由八十年代起，整理及收集了六、七十張月餅紙及月餅會的會員咭。幾廿年來，酒樓憑大時大節掛的大花牌，及小小一張月餅紙，鬥氣氛鬥得體。最早的一張來自民國年代(1949年前)，那時的人用雞皮紙包起一筒月餅，上面貼上輕薄紅紙，寫着《復聚長號---中秋月餅》就是。
然後印刷進步，五十至七十年代月餅紙，手繪的月餅、富貴花(牡丹)、嫦娥，或捧着月餅嘆茶的漫畫旗袍美女，衣服上的花紋，風景等，喚起Ricky小時候玩「月餅紙—Go」的記憶，「啲設計古色古香，有中秋氣氛一些。」非常偏心。八十年代印刷越來越精美，紅粉菲菲的八仙過海、萬馬奔騰的《三英戰呂布》歷史故事，都非常吸引。但到九十年代打後，印刷變得更有層次精細，但畫變成明星拿住塊月餅笑淫淫的美女照，Ricky倒興趣缺缺，像徵式儲幾張做比較算。儲到今日，還是最喜歡七十年代以前，印刷尚未普及的月餅紙，圖案都是雕板，或者手繪的，簡單得來，反而看得有種溫潤感。
現在說冰皮月餅、雪糕月餅、馬卡龍月餅古靈精怪，回看六、七十年代月餅紙，除了睇慣睇熟的七星伴月、雙黃白蓮蓉等外，還有如雙黃雞油月、北菇鴨腿月、叉燒金腿月等，唔知咩味的月餅。不過「五仁」需求量非常大，Ricky甚至會剝瓜子開欖仁賣去酒樓，賺幾毫子外快幫補船費。月下團圓嘛，還有些詩情畫意但估你唔到食乜的「銀河夜月」(五仁月餅)、「嫦娥奔月」(真係未問到係乜)、「風花雪月」(蓮子椰絲月餅)及「烏雲蓋月」(用次等荳沙造的月餅)。
記者：陳慧敏
攝影：劉永發
部份相片由受訪者提供
