日前離港去咗阿根廷旅行嘅公民黨候任立法會議員陳淑莊（Tanya），前日喺阿根廷過45歲生日，一班義工好有佢心，越洋整咗張生日卡賀佢。一向鍾意搞笑嘅Tanya不忘惡搞一班黨友成立嘅45條關注組，話「45歲關注組」前日正式成立，透露自己嘅慶祝活動就係食，除咗食過阿根廷出名嘅牛扒，仲試埋血腸、羊同內臟，相當有食神。
Tanya又話生日去咗「浪漫嘅世界盡頭」，就係阿根廷最南端、亦係全世界最南端嘅城市烏斯懷亞（Ushuaia），最特別係去咗電影《春光乍洩》拍攝場地Bar Sur，睇樂手現場表演時Tanya仲一時感觸，忍唔住喊咗出嚟。