萬眾期待的絕世好馬「巴基之星」將於周日（18日）復出，爭第十場三班1400米，而賽事亦已於呢日（15日）排位，「巴基之星」配蔡明紹負126磅排得有利嘅3檔，形勢可謂相當唔錯。
主要對手方面，葉楚航馬房曾於1400米大勝對手4馬位的「狀元才」排8檔配韋達；潘頓騎過一次即跑第二的「萬馬飛騰」排5檔；而新勝開鑼日同程1400米，今仗升班作戰的「阿甘」由羅理雅換梁家俊排1檔。
講番「巴基之星」，今朝由蔡明紹大圈單跳三段，隻馬戴上翠綠色新頭罩連眼罩，同隻馬綵衣顏色相近，相當醒神，正面印上KD兩個英文字，代表馬主Kerm Din。「巴基之星」今朝操前操後，都見練馬師告東尼吼到實，晨操專家積奇指「巴基之星」洒開大步領放，走來一氣呵成，體力十足，成熟狀態續進，睇嚟今仗的確可以再次贏在終點線。