翠綠色!巴基之星有新Look周日復出排檔係……

翠綠色!巴基之星有新Look
周日復出排檔係……

萬眾期待的絕世好馬「巴基之星」將於周日(18日)復出,爭第十場三班1400米,而賽事亦已於呢日(15日)排位,「巴基之星」配蔡明紹負126磅排得有利嘅3檔,形勢可謂相當唔錯。
主要對手方面,葉楚航馬房曾於1400米大勝對手4馬位的「狀元才」排8檔配韋達;潘頓騎過一次即跑第二的「萬馬飛騰」排5檔;而新勝開鑼日同程1400米,今仗升班作戰的「阿甘」由羅理雅換梁家俊排1檔。
講番「巴基之星」,今朝由蔡明紹大圈單跳三段,隻馬戴上翠綠色新頭罩連眼罩,同隻馬綵衣顏色相近,相當醒神,正面印上KD兩個英文字,代表馬主Kerm Din。「巴基之星」今朝操前操後,都見練馬師告東尼吼到實,晨操專家積奇指「巴基之星」洒開大步領放,走來一氣呵成,體力十足,成熟狀態續進,睇嚟今仗的確可以再次贏在終點線。