咪以為淨係教育局局長吳克儉先知日本邊度有嘢睇，環境局局長黃錦星都識，不過佢係外訪唔係旅遊，為咗考察自然保育同可持續發展，喺日本石川縣四圍走。
同石川縣官員會面期間，星爺向官員了解由日本環境省同聯合國大學高等研究所聯合發起嘅里山計劃，計劃旨在重建同維持與自然融合嘅鄉郊，令天然資源以持續方式使用同管理，同時維護生物多樣性。
佢之後到位於能登半島輪島市嘅白米千枚田參觀，佔地3.8公頃嘅白米千枚田內有1,004塊小梯田；星爺同時到訪金藏學校，考察當地生態旅遊嘅發展及推廣；而前日佢到新潟縣時仲去過著名嘅糸魚川聯合國教科文組織世界地質公園，交流兩地喺地質公園管理方面嘅經驗。