當我求大俠見到巴塞隆拿上場聯賽爆冷輸畀升班馬艾拉維斯嗰陣，就知道呢場羅渣士嘅些路迪做硬沙包，因為受傷嘅獅子永遠係最可怕嘅。巴塞喺周二歐聯分組賽，今季首次派出「MSN」三叉戟打正選，美斯就第六次喺歐聯大演帽子戲法，幫巴塞以7:0大炒些路迪。
美斯六次戴帽贏C朗
因為尼馬踢奧運，加埋國際賽期影響，巴塞到周二場歐聯C組首輪，今季先第一次出齊美斯、蘇亞雷斯同尼馬，踢番場好波畀主場球迷睇。尼馬上半場兩度助攻，美斯梅開二度，巴塞領先2:0。換邊後，尼馬同恩尼斯達各建一功，到60分鐘美斯射入個人第三球。喺呢場入球騷，又點可以漏咗阿蘇呢！呢位烏拉圭前鋒末段射入兩球，巴塞最終大勝7:0，創下球會史上喺歐聯最大淨勝球差嘅紀錄！其實羅渣士本來唔使捧蛋嘅，但穆沙迪比利喺24分鐘主射12碼，被門將達史特根捉到路撲出。
總結吓MSN嘅成績表，美斯入三球，個人第六次喺歐聯帽子戲法，超越五次嘅基斯坦奴朗拿度（C朗），獨佔歐聯帽子王寶座；阿蘇就入兩粒，至於尼馬雖然入得一球，但佢呢場化身助攻王，交出四次助攻，值得一讚！賽後羅渣士食蛋都食到飽，話巴塞真係勁到飛起，球員已經好努力，大敗亦唔係恥辱。至於巴塞主帥安歷基賽後大讚美斯係史上最佳嘅球員，踢咩位都有世界級表現。
拜仁主場13連勝破紀錄
同日拜仁慕尼黑都大炒對手，佢哋喺D組主場以5:0大炒羅斯托夫，歐聯主場累積13連勝，打破曼聯喺2006至08年創下12連勝嘅紀錄。喺呢場波，羅拔利雲度夫斯基、湯馬士梅拿同祖安巴尼特各入一球，但主角就係呢排腳風順到不得了嘅中場甘美治，佢今場入兩球。甘美治近半個月人氣急升，月初代表德國對挪威射入國家隊處子入球，上場作客史浩克04攻入加盟拜仁後首個德甲入波，呢場就首次喺歐聯建功。