今時今日潮流變得好快，打機潮流仲更加快，早幾個星期仲周街有人企喺度捉精靈，但𠵱家塞人嘅情況已經大大改善。
唔單止手機game，兩大傳統電視遊戲足球game就推出新版，為咗競爭真係花咗唔少心思，好似其中一隻更推出廣東話評述版，由本地著名足球評述員同前電視台體育主播聲演，新鮮感十足，小弟都睇過吓部份示範，不過就略嫌旁白唔夠地道，如果可以加埋啲港產美斯講：「x你個街，亞視嚟嘅」，或者「Dee王基」講：「今晚朗拿度好似軟腳蟹咁」，有呢啲對白嘅話，機迷、球迷打機嗰陣會更開心。
呢類足球game講求真實，唔單止有球員真名，連各樣技能數值都好接近，甚至有球員不滿個人數值偏低而上網發牢騷。
F字頭game最新版本就出爐，英超最快嘅球員係阿仙奴右閘比利連，數值達95，佢喺成個game亦都只係慢過格雷特霍夫中場馬迪亞斯波里同多蒙特前鋒奧巴美揚。小弟唔係質疑，但奇怪連利物浦快馬沙迪奧文尼竟然連頭20都冇入圍。
文尼係唔係利物浦冠軍最後拼圖，暫時仲言之過早，不過佢嘅速度，特別係運球突破能力，真係大大加強紅軍，利物浦今季擊敗阿仙奴同李斯特城嘅兩場勝仗之中，無獨有偶文尼都有入波。小弟都曾經懷疑過羅拔圖法明奴繼續成為正選嘅決定，不過大勝李城4:1一役就證明，領隊高路普（圖）極為重視速度、效率嘅程度。
周五英超早場利物浦作客車路士，可以話係英超今季加開周五場最矚目戲碼，車仔中場尼高路簡迪加盟至今一直大獲好評，甚至被譽為新馬基列尼，或者周五同文尼交鋒，就睇到邊位先係今季英超最佳收購。
文：牽牛