阿仙奴雖然喺周二作客對巴黎聖日耳門（PSG）嘅歐聯A組分組賽中，憑住「山神」阿歷斯山齊士喺下半場追和1:1，槍迷依然唔滿意球隊表現，因為今夏高價買入嘅梅斯達菲完全打唔出身價，而後備入替嘅基奧特都毫無建樹，仲喺五分鐘內連攞兩面黃牌，被逐離場。
曼城迎慕軍遇暴雨順延
今場開始咗42秒，PSG就由射手卡雲尼頭槌破網，早早領先1:0；身價3,500萬鎊（約3.6億港元）嘅中堅梅斯達菲走漏晒卡雲尼成為失波罪人，槍迷就喺網上批評佢只值35鎊，仲嗌領隊雲格查吓球會開支係咪寫錯咗喎。其實PSG喺上半場仲有機會拉開比數，不過卡雲尼連失兩個黃金機會，包括喺34分鐘單刀推過阿仙奴門將奧斯賓拿後射失，大難不死嘅阿仙奴喺77分鐘靠「山神」追平。不過後備入替嘅基奧特就冇乜表現喇，佢先喺88分鐘領黃，補時階段再同PSG中場馬高華拉堤互相推撞，齊齊兩黃一紅被逐。同日另一場曼城主場迎戰慕遜加柏嘅歐聯C組分組賽，因為暴雨而順延到周三舉行。
