某港島新盤近期密集式軟銷，最新搞作係搵來《暗色天堂》導演、亦即係林嘉欣老公袁劍偉拍咗套微電影，嚟緊會分五集擺上網。
發展商噚日叫齊傳媒、晨早包咗個戲院播優先足本版，主線力Sell家庭溫暖感覺，加埋15分鐘嘅劇情主線如果用淺白啲解釋，就好似CCTVB晚上8點長壽處境劇《愛．回家》咁，提醒觀眾一家人齊齊整整食餐飯好重要，至於好睇定悶爆、清新定庸俗，就見仁見智嘞。
發展商唔肯講花咗幾錢拍套微電影，淨係話，之前同導演構思劇本時，由一間屋最緊要係乜嘢出發，導演亦賣口乖咁話好鍾意個劇本。至於一套溫情微電影點樣同樓盤扯上關係？咁當然係取景時，拍多啲樓盤附近嘅靚景，曲線吸引你買層樓喇。