黃子華多次講過，佢嘅理想係做一個演員，唔係棟篤笑，但每次拍電影，套戲都唔收得，死死地氣做番棟篤笑，就場場爆滿。人生有時就係咁，你好想去做一樣嘢，個天就好似同你過唔去，但有時無心插柳，就唔知點解得咗。講咁大段開場白，其實係想講占士米拿，佢近年嘅職業生涯就喺中路同邊路掙扎，佢好想踢中路，但個天就玩佢，整定佢踢邊先踢得好。
米拿出道嗰陣都被稱為英格蘭新一代嘅天才，最出名係傳中，佢喺列斯聯同紐卡素嗰陣都踢邊，但喺09/10球季，時任維拉主帥奧尼爾搵佢打中路，令米拿發現自己原來仲有第二個可能，係可以做中路核心，其中對般尼一戰交出三個助攻，真係幾勁。喺維拉踢得好，米拿就去咗曼城，但喺曼城唔算得重用，大多係踢翼鋒嘅替補，間中有中路踢，但都係踢防中。
米拿一直都有顆踢中路嘅心，所以一年前拒絕曼城一份人工唔錯嘅合約，佢為嘅就係羅渣士嘅一個承諾，因為羅帥同佢講，嚟到利物浦就畀你踢中路。米拿舊年過咗兩個月踢中路嘅開心日子，但通常美好嘅時間都係唔長久。利物浦成績唔好，羅渣士走人，由高路普執教。
自從高路普上任，米拿離佢踢中路嘅目標又遠番，喺今季米拿仲踢到落左閘。諗起佢當初唔留曼城去利記就係為踢中路，但踢得兩個月後就完咗個中路之夢，都為佢感到無奈。
喺棟篤笑嘅結尾，黃子華話，就算甄子丹做佢嘅武打替身、梁朝偉做佢嘅文戲替身，佢都唔會用棟篤笑呢個舞台嚟交換，坦然接受命運。唔係中路嘅材料，靠效率同勤力橫掃邊路，唔知年過30嘅米拿又會唔會忠於自己，咩得就咩呢？
文：咖喱