阿里巴巴集團兩年前美國上市以來，由假貨問題俾人集體訴訟，到近期俾紐約證交所查數，質疑之聲從未停止，連美國著名投資者Jim Chanos都話，已經揀咗阿里做沽空目標。
不過，此一時彼一時，最近股市暢旺，阿里股價上升，過去一年已有超過五成升幅，難怪阿里副主席蔡崇信（Joseph）咁得戚，喺一個論壇上，對準Chanos開火，同大家講要尊重Chanos，因為佢沽空咗阿里股票，「目前正承受痛苦」，仲話佢唔係好識公司業務以及中國嘅網上經濟。
能夠趁股市升勢而趁機抽水寸人，去到呢種境界，除咗Joseph之外，真係搵唔到邊幾個。
Chanos沽空阿里嘅原因，係佢質疑阿里巴巴嘅業務模式，而且冇全面披露公司財務數據，尤其係物流業務。Joseph寸完人之後，就話會邀請Chanos參觀公司總部，畀着係你，會唔會過去望吓呢？