蘋果公司上周三發佈多項新產品，iPhone 7最多人留意，無線耳筒AirPods就最具爭議性。好多人認為AirPods外形奇怪，而且仲容易脫落兼唔見咗。可能見到大家唔多buy呢對無線小耳筒，蘋果行政總裁庫克噚日就親自講解，消除果粉對AirPods嘅憂慮。
庫克接受美國廣播公司（ABC）訪問時話，佢試過喺好多情況下戴住AirPods，無論係喺跑步機上，做緊一般嘢時，甚至係跳舞時，AirPods都冇跌落嚟，穩穩陣陣喺原位。
庫克繼續賣花讚花香，指有電線嘅耳筒總係容易勾住嘢，AirPods就冇呢個問題，電線反而係耳筒脫落嘅主因㖭。
所謂「事實勝於雄辯」，為咗證明AirPods唔易脫落，庫克應該向大家表演戴AirPods跳舞，相信「果迷」都好想見教主另外一面。