今日開始迎月，希望天氣好啲啦，上星期日日有雨落，好少見到太陽，如果迎月賞月追月三日都係咁嘅天氣，中秋節相形失色，大人賞月固然冇癮，小孩子到公園或屋邨公眾平台玩燈籠，更加煞風景。每年大節日之中，新年細路有利是收，放長假，當然高興，但在中秋夜於室外提燈追逐，更加快樂忘形。不過，天文台預測中秋迎月賞月追月三日都會天氣差差差，認真煞風景。
今年居然有燈籠冒牌貨出現，最初令左丁山大惑不解，紙燈籠幾乎係用完即棄，買乜名牌燈籠呀？冇名牌，又駛乜假冒啫！後來問一孩之母小G，小G話：「有好多卡通人物做主題嘅燈籠㗎，淨係Elsa已經賣到唔停手。」哦，商人又係幾肯動腦筋，居然將受歡迎卡通人物像印在燈籠上面，吸引孩童，啲小女孩一見Elsa就瘋狂，個個識唱Let it go，美帝文化如此入侵，出動飛機大炮都唔會阻截得到！既然如此，唔怪得海關要掃蕩肖像侵權嘅「冒牌燈籠」啦。
前幾日有人送朱古力月餅俾小G，係名牌嚟嘅，呢隻牌子本以女裝出名，近年兼營餐廳，走優雅高價路綫，有朱古力出售。今年為了招徠，賣朱古力月餅兼送一個小燈籠，話「好精美」咁講。小G收了禮物，多謝一番之後，返到屋企拉開一睇，阿媽已經變臉，乜反應咁快呀？皆因燈籠係以藍啡色為底色，籠頂一片深藍，阿媽有乜辦法唔啋啋聲吖，立即將燈籠銷毀。
呢間A字牌來自歐洲，負責市務推廣之人，唔知係外國人吖還是本地千禧世代，不識甚麼叫做藍燈籠，仲要在中秋節人月團圓嘅日子以藍燈籠為禮品，香港人（要年紀大少少嘅）唔知好嬲定好笑，多數都係嬲㗎嘞，如果一早知道邊有顧客願意買呢隻「朱古力月餅」噃。最無辜嘅係送禮嘅公司，佢地以為A牌夠cute，買了不少朱古力月餅贈券送俾不同客戶，點知A牌派埋藍燈籠喎，實在係公關災難。後來聽呢隻牌子嘅熟客靚女V講，「A牌嘅Corporate logo就係藍色㗎嘛，乜你地咁古老！」
趁大節日推出卡通商品，算係文化產業／創意產業嘅商機，以前對呢啲產業唔多明白，覺得比較務虛咗，睇完里約奧運之安倍晉三扮馬里奧，就會完全明白晒。安倍本來並不太受日本人民歡迎，里約奧運閉幕禮在YouTube廣傳之後，安倍在日本之民望急升四個百分點，並且帶動日本卡通動漫產品業繼續向上，令人認識點解騰訊股價為何可以升完又升，市值破二萬億港元，文化產業大有希望壓倒地產發展！