今屆立法會選舉，幾乎所有泛民都係用反梁振英做政綱。由頭號「梁粉」變成反梁悍將嘅劉夢熊，雖然因妨礙司法公正而被判監，但係原來佢身在監獄一樣有喺立法會選舉投票，佢話除咗自己，仲叫埋親朋戚友投反梁嘅白鴿黨一票。
信末自言坐「冤獄」嘅夢熊大師，喺選舉後託人畀咗封信民主黨單仲偕，叫佢轉交白鴿黨，信入面除咗恭喜白鴿黨選舉勝利，仲話自己係九西選民，喺監入面直選投咗票畀黃碧雲、超區投畀鄺俊宇。佢家人共有5票，地區直選都係全投白鴿黨，超區兩票畀涂謹申，3票畀鄺俊宇，真係估唔到夢熊大師坐緊監都一樣咁關心選舉，仲可以同屋企人配到票。