上月底80歲大壽嘅林建名，前晚同愛將何傲兒喺西環搞上契，筵開6席，除傲兒父母同胞姊傲芝，黃婉曼同老公馮柏基、新婚嘅王賢誌同陳爽等都到賀。上契做足傳統儀式，傲兒雙膝跪地斟茶，又送契爺玉馬擺設，契爺回贈契女一套金碗筷後叮囑：「生生性性，將來有金飯碗一定會好。」傲兒仲叫林建名做「老闆」，林建名忍不住提佢要改口叫「契爺」。
孝信同慶生
傲兒承諾會孝順契爺：「以後對你好似對我爸爸一樣，我將來有穩定男友，仲會同佢一齊去睇你搞嘅演唱會。」契爺聽完猛叫好，她識做左擁右抱親生爹哋同契爺合照。
本月27日就28歲牛一嘅傲兒，同林建名孻仔林孝信竟有緣到同年同月同日生，所以前晚雙喜臨門，呢對壽星仔女仲孖住切蛋糕。傲兒講到生日願望時話：「開開心心，希望身邊人都健康就好，我事業又有好發展。」
撰文：馮仁昭