做得賭場大亨，最緊要識控制風險，好似金沙（1928）主席蕭登艾德森（Sheldon Adelson），經營賭場多年，即使見到澳門賭業陰霾滿佈，依然冇有怕，照開新賭場巴黎人，佢仲可以保持一貫幽默作風。
巴黎人噚日舉行開幕禮，83歲嘅艾德森表現風騷，佢喺記者會上講笑咁話，自己做咗咁多年人，人生最大風險就係結婚，佢話有得揀，寧願娶世界盃、超級碗等世界體育盛事，相信好多已婚男士多少有啲同感。
艾德森幽完自己一默，搞到全場笑晒，包括坐喺台下嘅艾德森太太Miriam，佢哋結婚超過廿年，噚日十指緊扣行紅地毯入場，相當恩愛。
講開又講，洋人都幾鍾意帶埋老婆出席記者會，好次上月永利皇宮開幕，永利澳門（1128）主席史提芬永利亦攜眷出席，仲專登喺台上介紹太太。艾德森都唔例外，而且喺宣傳片入面，佢同老婆經營一齊亮相。
相反華人社會可能仲有「男主外、女主內」嘅傳統觀念，較少見本港上市公司老闆經常帶老婆出嚟見人，最好老婆有咁低調得咁低調㖭。
而且，佢哋主持記者會，多數十分正經嚴肅，眉頭緊皺，洋人老闆就多數識講笑搞氣氛，好似艾德森當住老婆面前講笑，又有幾多男士敢講呢。