廣東話有句盲舂舂係咁衝，套用落今屆里約殘奧嘅田徑男子1,500米T13級比賽就最適合不過喇，因為喺呢項為視障人士而設嘅賽跑入面，前四名選手嘅成績，都比之前里約奧運嘅1,500米金牌得主快！T13級別係視力殘障入面等級最低嘅一組，較為嚴重嘅有T12和T11級。講番場比賽，阿爾及利亞嘅巴卡喺最後一圈帶出，本來埃塞俄比亞嘅德米瑟後上個勢好好，但可能真係睇得唔清楚，未過終點已經收步，結果巴卡以破世界紀錄嘅3分48秒29奪金，德米瑟就以3分48秒49得銀牌，季軍同殿軍就係肯雅嘅基爾瓦同巴卡哥哥福阿德，時間分別係3分49秒59同3分49秒84；四個人全部都快過今屆里奧1,500米冠軍辛度維斯，佢跑出3分50秒00咋！不過都要幫辛度維斯講番句公道話，因為喺里奧度冇人肯放領，佢先以3分50秒00呢個近80年嘅最差奧運成績奪標啫！
任國芬200米決賽獲第八
香港選手方面，任國芬喺女子T36級200米初賽以34秒73打破自己最佳時間，以第八名晉身決賽，最終在決賽以34秒87得第八名；輪椅劍擊嘅張明仔同陳穎健，喺男子A級佩劍個人賽就未能晉級次圈。