主理雪肌蘭、人稱「鯊魚女」嘅陳細潔（Abbie）一直係公益界名媛，陳細潔現為保良局署理主席。
雖然Abbie係千金小姐，但原來兒時冇零用錢，每次買嘢食都要問准媽媽，所以好珍惜金錢。佢批評，家陣物質豐富，好似佢有位親戚，明明阿仔都未話要換電話，媽媽一見有新電話出，就擔心小朋友冇得買唔開心，自動波幫佢換咗，咁阿仔想識理財都難喇。
「家長們喺我哋嘅年代冇咁多享受，可能𠵱家自己經濟環境做到，都希望阿仔用最好」。雖然Abbie明白家長心理，但堅持咁樣更加要教小學生理財，而且仲要教埋家長，一齊親子上堂先得。
於是保良局繼續同花旗銀行合作，希望透過話劇比賽、製作益智教材等活動，向保良局一班小學生灌輸理財知識，並提醒家長唔好過份緊張。