一年一度海洋公園哈囉喂全日祭噚日揭幕，年年都扮鬼扮馬嘅前主席盛智文今年退下火線，改由副主席劉鳴煒粉墨登場，化身《捉鬼敢死隊》隊員，帶埋捉鬼槍上台介紹今年哈囉喂景點。唔知係唔係太多人望住，劉鳴煒睇得出有啲緊張，不時要耷低頭睇貓紙，但仍然不忘chok樣show招牌package，仲追問台下自己「夠唔夠型？」
盛智文：「桂綸鎂」未夠班
而今年哈囉喂開幕表演就大玩政治抽水，明明係花生騷，但其中一個男丑角叫君堯，另一個女丑角就叫海恩，仲話叫人要睇住個後台。當有角色無端端失蹤，君堯仲話佢係坐洗頭艇用自己嘅方法離開，搞到全場拍爛手掌。
至於盛智文就繼續大讚今年鬼屋夠驚嚇，「100 times scarier than the LegCo election（比立法會選舉驚嚇百倍）」。被問到對今次選舉結果嘅睇法，佢話樂見更多年輕人加入議會，認為會改變老一輩嘅諗法，又指本土派同泛民以至建制都有合作空間。
佢又自爆見過自稱「政壇桂綸鎂」嘅新民黨候任立法會議員容海恩，「Regina（葉劉淑儀）帶她來見過我」，大讚容海恩有法律知識，亦有做青年工作，但要取代葉劉就仲未夠班。
李八方
mailto:[email protected]