民建聯曾鈺成最近為商台主持節目《鈺成千里目》，首集嘉賓係胞弟曾德成，大爆細佬退休後日子好充實，仲喺北京住咗幾個月了解國情，曾鈺成仲自爆試過怒斥售貨員㖭！
曾氏兄弟話當年，指71年文革期間一家人到北京旅行，係佢哋人生第一次出門兼坐飛機，不約而同好記得喺王府井揀西瓜，揀完瓜販直指「不是好瓜」，曾德成話當時好似去咗《鏡花緣》嘅君子國；曾鈺成則大讚當時北京居民真係好有人情味，唔少人會讓座兼禮待外來客人。
但喺80年代六四前，曾鈺成再到北京去國營商店買絲巾，叫店員攞兩三條嚟睇睇就被喝斥「要不要？要就付錢，不要搗亂！」激到曾鈺成怒斥對方：「國家的架給你丟了！」