曼城領隊哥迪奧拿踢走赫特買哥迪奧巴禾，巴禾喺上周六曼市打吡甩晒轆，赫特有睇波應該會掩住半邊嘴笑。不過赫特都唔好得幾多，喺周日意甲首次為新東家拖連奴披甲就累球隊輸波。
Joe Hart變Hart John
拖連奴作客阿特蘭大，賽前張出場名單已經有啲怪，平時叫開「Joe Hart」嘅佢變咗做「Hart John」。其實赫特英文全名叫Charles Joseph John Hart，嚟到意大利想有新開始，轉下寫法都無妨嘅。拖連奴喺呢場波踢到54分鐘先開紀錄，赫特直到呢一刻嘅表現都不過不失，傳波亦算準繩，點知分幾鐘後出迎接角球就出事，雖然拍到嗰波，但係拍咗畀隔籬嘅安祖亞馬斯路窄位射入。
赫特失波後冇受到影響，仲有幾次出色撲救，不過完場前拖連奴守將迪施維斯查喺禁區犯規，12碼由基斯爾射入；赫特人生第一場意甲，就因為佢嘅失誤而輸波收場。賽後拖連奴教練米赫洛域話：「我冇怪佢，比賽經常出現呢類犯錯，佢喺今仗表現好好。」
托迪又做救世主
同日，羅馬老王子托迪就示範下咩係救世主。羅馬主場對森多利亞半場落後1:2，比賽一度因為暴雨暫停，易邊後托迪後備入替，先助攻畀迪斯高扳平；再到補時三分鐘射入12碼，一手帶領球隊反勝3:2。