噚日港股同亞洲市場接花旗國禮拜五跌勢，大插插。咁連本報即時新聞噚日都大標題話：「加息恐殺到！」去解釋跌市。大家一定諗，點解忽然會恐加息呢？數據？唔係。聯儲局言論有變？唔係。
孫柏文兩周前喺本欄，寫咗篇題為《聯儲局將大嗌加息》嘅文，當中，我話過聯儲局最大問題，係冇人信。就算喺8月尾，副局長Fischer話：「今年不但有條件要加息，仲可加兩次。」啲人都係當佢膠噏。
咁點解忽然市場又信呢？其實，之前令大家唔信聯儲局會加息（即短期息率），就係因反映市場對長線經濟表現嘅長債息率係咁跌。令到長息同短息逐步收窄，教科書話一旦長息低過短息，就經濟將衰退。喺咁嘅情況下，大家都覺得你聯儲局唔會人為地令長、短息收窄，甚至倒掛。點知，上周末段，嚴重錯估年初負利率會有反效果嘅日央行，可能因想踢短息返零，不過又唔想見長息（都係負利率）低過短息，被傳大量拋售日本長債，想踢高長債息率。仲要德國都係，兩國長債息率「爆升」，由負數變零。
就係咁，啲人諗，聯儲局會唔會都用同一招去踢高長債息率後，為加短息鋪路呢？而最令人恐慌，就係聯儲局幾年前，玩operation twist，特登拋售短債去買長債去推低長息，因佢哋信會推動經濟。𠵱家掉轉，會否示意由08年至今聯儲局政策背後邏輯都被推翻？係的話，又點可以持貨呀？所以今次市場咪忽然信聯儲局會加息囉！
孫柏文
獨立股評人
http://www.fb.com/shuen
本欄逢周二刊出