重慶機電（2722）主打瓣數食正環保汽車同電線電纜爆炸增長期，有機turnaround，重機家陣仲喺七年底，超抵煲。
重機今年上半年，盈利微跌咗6%到1.73億元（人仔．下同）。但咁睇，呢期成績單，重機電纜分部溢利增長咗2.5倍，到1.5億元，另一瓣汽車傳動系統，就由上年大見紅2.7億元，到呢半年度微蝕380萬元。
綜合資料同諮詢機構估計，「十三五」時，新能源汽車產銷量要達到500萬輛，又到咗2020年，全球新能源汽車銷量，會超過1,500萬輛。重機講明，已經加快喺新能源汽車傳動系統推廣，今年兼有望實現「恢復性增長」。食住環球環保汽車大勢，重機呢瓣已經重拾正軌。
又同樣按規劃，「十三五」期間，內地電網建設嘅累計投資總額，唔會少過1.7萬億元。重機主打電纜，食國策條水，一樣食到應一應！
重機現價0.92港元，係七年海底價，得7倍幾往績PE，唔好計多，今年turnaround，EPS輕微增長5%到0.137港元，明年食住上邊兩個瓣數發力，EPS再增長20%，到0.164港元，預測PE跌到得5.7倍，比歷史平均7.8倍，平咗37%！
重機對口係重慶市政府，得34億港元市值，有大孖沙母系，遲早被湊到肥肥白白。
唔講呢筆，齋計硬數據，煲重機，當翻半番到1.4元計，明年預測PE上到8.5倍，比歷史平均高咗少少，但講緊仲係超殘單位數！
錢雋
細價股專家
本欄逢周二刊出