立法會選舉之後，一件以為難度百分之一千嘅事情發生咗嘞，就係李怡、張志剛、徐詠璇、黃永、陳雲等五位，竟然會意見一致嘅，就係同時痛罵臭罵戴耀廷，深梁微梁反梁竟會統一口徑，雖則背後理由不同，發表批戴言論，戴蛋頭實應深感榮幸，鞠躬致謝。
戴耀廷搞雷動計劃，由年頭到選舉日，一直反應麻麻，引唔起大反應，估唔到一啲老泛民輸咗選舉之後，就有咁多人賴佢累事，都幾好笑。一位法律學系蛋頭教授實戰經驗欠奉，讀書教書未離開過薄扶林，有乜本事連累老將黃毓民、李卓人、馮檢基、新雀陳雲、黃洋達等失手吖。實際上，黃毓民敗於輕敵，大意失荊州，馮檢基敗於毫無魅力，空降新界西憑乜嘢本錢嚟在鄉村搶票呀？人地朱凱廸下鄉蹲點，深耕細種近九年，嗰八萬幾票分佈於不同票站，你估係配番嚟㗎？李卓人搞工運太耐，已流於嗌口號，成日推動赤化經濟思維，經濟政策立場與工聯會毫無分別，在天水圍邊夠麥美娟搶吖，輸去席位並不是意外，投朱凱廸票嘅選民，幾難會過票俾一位食老本嘅老工運。
選舉失敗了，必有不同原因，泛民素來山頭林立，不願協調，不至於在比例代表制之下嘅選舉大敗，其實反映咗香港選民支持民主自由呢個大原則，但唔似得工聯會民建聯及工商界組別可以咁聽指揮嘅；人地王國興猶可自怨點解自己唔係LSE畢業生，雖然忠心兼落力，日以繼夜、夜以繼日咁樣反拉布，最後還是頂不住鼎少得契爺關顧。
講起王國興，近二十年前憑頻頻出席城市論壇爭取發言出鏡而開始為人認識，當時班維園阿叔阿伯個個有意無意間讓佢首先舉手，佢又幾鎮定，有備而來，發言有條理，左丁山開始注意佢，但想唔到佢可以最後由維園走入立法會議事堂。一位資深專欄作家罵羅冠聰大學未讀完就入立法會，學業未達標咁話，哎吔佢大概忘記咗工聯會上一輩多數係未考過（或考唔到）大學嘅，例如鄭耀棠、陳婉嫻，分拆出來嘅譚耀宗、王國興亦如是，佢地嘅學歷統統差過羅冠聰！美國近28年總統出身非耶魯即哈佛，英國首相幾乎由牛津壟斷，香港就唔同，三任特首未有任何一位出身於本地大學，話政治人物教育程度未達標，因住boomerang！