滙豐銀行在港屹立超過150年，佢哋嘅歷史同香港息息相關。昔日英資大行都有自己檔案部，滙豐亦唔例外，滙豐歷史檔案展覽館原來坐落於奧海城滙豐中心內，面積約2,000方呎，保存超過200件實體展品，舊年4月翻新後，展館最近開始接待學生、歷史學者同客戶預約參觀。
滙豐最為人熟悉嘅，除一對銅獅外，仲有中環總行呢個著名地標，現時沿用嘅物業屬於第4代建築，1985年落成至今。至於外觀呈「山」字形、1935年竣工嘅第3代物業，亦相當有名，圓拱形天花板刻有歐陸繪畫，細心一看又見財神畫像，名副其實中西合璧。
展出前大班榮休刺繡
噚日滙豐香港區行政總裁施穎茵現身展館，仲分享佢童年回憶，話細路女時代，每逢周末下晝，都會去山字形總行，好緬懷內裏建築優美。唔講唔知，原來施穎茵媽咪以前亦幫獅子行打工。
滙豐昔日地位顯赫，從展館內前大班昃臣爵士（皇后像廣場有佢銅像）1902年榮休獲華商送贈嘅刺繡可見一斑，掛毯上刻《詩經》「秋水伊人」佳句，意指對方高風峻節，可望不可即。施穎茵話，下一階段會研究係咪開放展館，讓市民預約參觀，但目前未有具體時間表。
李華華
mailto:[email protected]