滙豐歷史檔案展覽館有好多與香港歷史有關嘅寶物，好似呢堆鈔票就有一段深刻嘅歷史故仔。
話說二次大戰，香港喺1941年聖誕淪陷，滙豐前大班祈禮賓爵士死於赤柱軍營，中環總行被日本軍部徵用，呢段時間，可說是獅子行在港最坎坷嘅歲月。
滙豐亞太區歷史檔案庫高級經理邵蕙蘭指，當年日軍脅迫滙豐簽署庫內尚未發行嘅鈔票，令大量現鈔投入市場。
戰後，行方為恢復公眾對港幣信心，決定動用1,600萬港元兌現日治時期嘅迫簽鈔票，呢一捆捆陳年舊鈔，就成為今日滙豐歷史檔案展覽館內嘅珍貴文物。
大學修讀歷史、並取得檔案管理碩士嘅邵蕙蘭，畢業後即加入滙豐檔案部工作，至今14載。佢透露，除香港外，集團喺倫敦、紐約、巴黎均設有檔案部。
