「才子」陶傑偶爾出席樓盤宣傳活動，噚日佢為某個港島區新盤做推廣，暢談佢點睇港島樓，形容大潭灣一帶好sexy，正過山頂㖭呀。
陶傑指，人同地理有個相似之處，假如香港島係一個21歲嘅女仔，山頂就係頭，大家都會留意，「係人都知山頂最貴，望住前邊個維港，但山頂高調，真正大富大貴唔鍾意住種植道、山頂道」。
才子當然名不虛傳，佢望女仔都唔係望個樣咁表面，佢指，大潭灣一帶就似胳肋底，好sexy，因為純天然、冇得整容。陶傑形容大潭灣係「維多利亞港嘅後花園，後花園貴過天井」，清靜之餘，附近綠化又多，有水塘，有齊山、海、湖，所以咁值錢。
佢去旅行都鍾意揀啲地理嘅胳肋底，「地中海嘅胳肋底係摩納哥、尼斯一路過到去意大利北部，一邊係海、一邊係山」，講到大家都想跟埋佢去旅行。