【本報訊】新城電台昨在官網宣佈交回數碼聲音廣播牌照，在新城開咪17年的葉文輝（啤梨，圖）昨稱未受事件影響，「我個節目係星期一至五，夜晚8點至10點喺知訊台（非數碼廣台）播，只係節目有時會同數碼台聯播，所以呢件事對我冇影響」。問啤梨有否影響士氣，他說：「都唔會有影響，做咗10幾年睇化咗，咁多年見到唔同電台都有唔同改變，𠵱家心態係如果有得繼續為廣播界出分力，就繼續做落去。」
阿Bob：好可惜
在知訊台擔任兼職節目主持的范振鋒，昨表示：「好傷感！喺新城工作咁多年，睇住廣播業喺好高峯到𠵱家受科技影響，令傳統媒體分散廣告，數碼台初初諗住啲聲會好啲、靚啲，但𠵱家睇住幾個數碼台逐個交還牌照。」同樣有主持節目的林盛斌（阿Bob）則說：「我估生意難做，電台想多啲廣告，但市道唔好，之前DBC、鳳凰相繼冇做，𠵱家又到新城數碼台，真係好可惜。」據一些新城DJ透露，今次電台將數碼聲音廣播牌照交還，對前線DJ影響不大，原因大部份DJ都是為知訊台主持節目，不會因取消數碼台而令工作量減少。
■記者余燕儀、沈寶茜