有名你叫吳得掂，可想而知教育局局長吳克儉，有幾咁掂！撇開鍾意遊埠唔開會、撇開愛做女人背後的男人、撇開任內似乎冇乜建樹……原來諗唔到有乜經典作，反而笑料一籮籮，近日好有心咁向新當選嘅議員發信祝賀（圖），但喺超級區議會勝選嘅梁耀忠，收到封信卻唔多妥，因為信中話喎：「祝賀你於2016年立法會換屆選舉中的教育界功能組別成功連任」，查實吳得掂知唔知葉建源先係教育界議員？
梁耀忠收到恭賀信之後，即時喺facebook公開，話希望吳克儉局長了解，佢係經區議會（第二）功能界別當選新一屆新立法會議員，唔係教育界：「更無意取代葉建源議員。」
王永平：不知所謂
阿忠一貼出呢封信，即刻喺網上瘋傳，當局相信都聞到辳味，教育局新聞秘書回覆傳媒查詢時話呀，局長衷心祝賀梁耀忠議員競選連任成功，「對於信中的手民之誤，局長謹向梁議員致歉，將責成同事再次致函祝賀」。咦，責成同事，即係唔關佢事；可見公務員同吳得掂嘅關係有幾好！有啲網民好清醒，話封信都係公務員寫、局長簽字嘅箒，係咪俾啲𡃁跣鑊金？公務員事務局前局長王永平就喺fb留言：「香港何其不幸，出了個不知所謂的教育局長和竟然認為他可以勝任的特首……為了香港下一代的福祉，希望中央不要讓他們兩位連任。」
識睇睇留言
Linn Lin：廢到極點！！！嘥錢養佢！！！之前一切鬧佢冇鬧錯！
陳民：打呢封信嗰個文員，明知佢唔會睇就畫隻龜上去，你今次死得了，跣唔得掂一鋪。不過，我都向你這個義士致敬
Amy Yick：廢柴局長廢到咁有喜劇效果呀？
Lok Tsui：雖然超越唔到關家姐，不過都係note7到冇眼睇
資料來源：《蘋果》facebook及網頁
李八方
mailto:[email protected]