周日美網男單決賽，華域加以盤數3:1反勝一哥祖高域，贏得職業生涯首個美網冠軍（小圖）。值得留意嘅係，華域加曾經三次殺入大滿貫決賽，而三次面對時任世界第一嘅選手都贏到，可以話係近代「一哥殺手」！
周日美網決賽打咗接近四粒鐘，三號種籽華域加雖然先輸一盤6:7，但佢喺第二盤越打越進取，最終靠全場46次主動得分連贏三盤6:4、7:5、6:3，以盤數3:1反勝一哥祖高域，職業生涯首次喺美網封王。值得留意嘅係，華域加喺大滿貫三次打入決賽，三次都係擊敗當時嘅一哥奪冠，包括2014年澳網贏拿度，以及2015年法網同今次美網雙殺祖高域，呢位31歲瑞士球手都可以算係近代「一哥殺手」。華域加賽後都忍唔住流下男兒淚，仲話：「我嘅目標唔係贏得大滿貫冠軍，只係每次出場比賽都會盡量爭勝，我想逼自己進步。」
反吸「爆甲」祖高域
祖高域就慘喇，職業生涯七次打入美網決賽，只係得2011同15年贏過冠軍；而呢位29歲塞爾維亞球手喺比賽期間，仲似乎因為腳趾有傷影響表現，喺第四盤兩度要求醫療暫停，除鞋後見佢對白襪染有血迹。祖高域賽後就話：「我嘅腳甲當時甩咗兼流血。我都好想堅持比賽，但真係痛到頂唔順，先會申請醫療暫停。」
