雷神過去幾日經歷高低起伏，沙田開鑼戰僅得一Win，剛周三谷戰亦只一捷兼犯規被罰本月18號起停賽兩期，但昨日（10日）他則於澳洲兩勝級際賽。這天回師沙田馬場，第三場五班1400米，雷神又以神級騎功贏大熱門「好友益」，個人停賽前有頭馬落袋，「好友益」3.8倍打開服役勝門，組合獨贏A2則派18元。
今場由見習生黃皓楠騎「踏雪名駒」放頭跑主動，徐雨石馬房細粒馬「好友益」體重僅990磅，卻負133磅14檔起步好難跑，臨尾「踏雪名駒」看似穩操勝券，不過雷神卻腐朽為神奇，力留到最後百幾米，於外叠及時衝過「踏雪名駒」勝出，個人發揮可謂一絕，騎練更雙雙保持開季後三戰例贏未斷纜。
徐雨石說：「『好友益』今場取勝全靠莫雷拉，排14檔留前或鬥後都是五五波，由雷神自己執生。最終雷神決定放棄前段，選擇留在『知道勝』之後，結果戰略成功。他夠膽攝位，騎功出色外仲好有膽識，如果沒有雷神恐怕都幾難贏。」
「踏雪名駒」繼開鑼日跑第三後，今場名次升一級至亞軍，但就仲未打開在港勝門，三、四名順序「知道勝」及「齊齊健康」，四重彩派5,837元。