黃大仙祠噚日舉行「道家全真派皈依冠巾證盟科儀」，究竟係乜東東？原來係新晉道長畢業禮。
今年嗇色園招收咗25名新道長，嚟自工程、教育同科技界等，由學士到碩士生都有，仲有唔少年輕道長，最年輕嘅得25歲，仲係家族中第三代道長，任職銀行嘅佢希望改變年輕人對道教嘅睇法，「唔好以為所有道士都係捉殭屍」。
幫手誦經探病友
嗇色園2006年起公開招收新道長，年滿18歲人士修讀課程同通過考核就可以正式成為道長，噚日黃大仙祠舉行新道長入道儀式。嗇色園黃大仙祠監院李耀輝話收弟子最講究誠意，不論貧富一視同仁，道長雖然唔使長駐黃大仙祠，但要不時幫忙誦經或探訪病友。
李耀輝話下次招募道長可能最快要到2018年，因為該祠規定最多招收400個會員，𠵱家已經有331人，可能多招一次就唔會再公開招募，每名弟子入會需畀3萬蚊費用和每年600蚊年費。近年年輕人對政府同特首有唔少怨氣，李耀輝認為最重要係包容，又話年輕人有志向，唔可以過份遏制。
25歲嘅葉家銘係今年最年輕嘅新道長，佢阿爺同爸爸都係黃大仙祠道長，細細個就接觸道教，「覺得道士啲衫好得意」，喺多倫多畢業嘅佢𠵱家任職銀行，佢話年輕人對道教認識唔夠，希望可以幫手傳承道教文化。
李八方
mailto:[email protected]