嗰頭講緊雷神第四場疑似揀錯馬，冇咗「御風雲」呢一Win，呢頭佢於第五場四班1400米有重蹈覆轍之嫌，上季煞科日由雷神於同班同程得第二的摩廐馬「駿馬翹楚」，今場由祈普敦接手，雷神則騎番上仗由自己跑第三的「情趣」，結果「駿馬翹楚」爆12倍冷Win，組合獨贏A2派44元正，「情趣」屈居亞軍。
今場賽果再次令雷神粉絲感到心傷，相反「駿馬翹楚」人馬首度合作即有火花，藉輕磅之利沿途貼欄前置，臨尾力抗「情趣」來犯率先衝線，四歲新西蘭自購馬打開在港勝門，「駿馬翹楚」練馬師大摩跑到開季第三個賽日，亦告取得季內首Win。
祈普敦連同頭場勝出何良「祥勝駿駒」在內，在港初次贏馬即起孖，個人一手為兩匹賽前未勝馬開齋，可謂交足功課。第五場拉頭馬時祈普敦女友Morgan亦有現身，一齊晒恩愛。
第五場二至四名順序為「情趣」、「發明達人」及「騏名燈」，其中「發明達人」於閘廂內一度扭計要重新入閘，情緒難免受到影響，否則可能跑得更好，四重彩派17萬鬆啲。