新一屆立法會議員下月就任，而特首梁振英嘅現屆任期呢，唔夠一年就完咯。梁班子會唔會喺餘下任期，夾硬重推俗稱「網絡23條」嘅《版權修訂條例》，備受關注，皆因喺更多本土同自決派嘅非建制人士當選後，當局以後要霸王硬上弓，似乎較上屆立法會難度更高。
商務及經濟發展局局長蘇錦樑噚日出席完喺秘魯舉行嘅亞太經合組織會議返港時，就被問到會唔會喺新一屆立法會10月運作後，重推《版權修訂條例》？蘇錦樑明言本屆政府唔會，但就強調《版權修訂條例》需要與時並進，唔會低估修訂嘅困難，政府會就點樣更新條例，聽取更多意見後再研究喎。
至於8月份嘅訪港旅客數字，佢就話下降咗，指香港旅遊業正處於調整期，政府會同業界共同努力，提升本港競爭力。