二度招股上市嘅澳至尊（2031）今日掛牌，呢隻股第一次招股時，因國際配售部份不足額而告吹，一個月內捲土重來，改為將全部股票賣畀散戶，主席蔡志輝大概十分相信代言人蔡少芬嘅魅力，可以吸引散戶垂青，點知第二次招股都係唔足額，得九成認購率。
以往有明星代言人嘅新股，唔少都請到代言人出席投資者推介會或上市儀式旺一旺場，不過，澳至尊招股至今都唔多見蔡少芬夫婦嘅蹤影，聞說佢兩位今日亦就唔到時間出席上市儀式。
但都合理嘅，代言人合約寫明有乜活動。根據招股書，蔡少芬夫婦跟澳至尊今年續咗約，到2018年2月第一期合約費用150萬元，第二期200萬元，包電視、印刷廣告各拍一次，同理出席三場推廣活動，都冇話要出席上市活動。