恒隆地產（101）董事長陳啟宗（Ronnie）一向有幽默感，家族有成廿億美金身家都話覺得自己窮，唔知仔仔陳文博（Adriel）係咪遺傳咗呢份幽默感，早幾日同傳媒喺大連食飯嗰陣，大搞爛gag。
陳啟宗兩父子上星期帶香港傳媒去大連，參加旗下商場開幕禮，期間，陳啟宗爆料話，阿仔已經有女朋友。
華華之後趁食飯時間，走去八卦Adriel平時同女朋友去邊度拍拖，Adriel話鍾意行小店，問佢有冇幫襯恒隆助理董事關則輝成日推介嘅大坑粥店新康記時，佢竟然搞爛gag話：「我唔係好食軟飯……」搞到關則輝個心都離一離。
Adriel隨即補鑊，指自己廣東話唔係咁叻。佢話比較鍾意行深水埗，因為「覺得鴨寮街好過癮」，會順手去信興飲茶，或幫襯新香園（堅記）嘅蛋牛治、新榕記燒腩仔咁，講到好貼地。
見Adriel講食講得咁開心，大家乘機追問女朋友仔喺邊識、幾時拉埋天窗之如此類，點知佢極度口密兼怕醜，仲扮撞聾反問「我識咗Ronnie幾耐？三十幾年喇」，Ok，你贏了。