特首梁振英（CY）女兒梁齊昕出親去蒲都成為焦點，令父母擔心，齊昕噚日25歲牛一，前晚就喺禮賓府開P，CY兩公婆仲傍實壽星女揸刀切蛋糕，一家三口難得合照，齊昕阿媽梁唐青儀着住紅色「龍蝦裝」贈興。
齊昕開P，獲邀嘅友人都集郵打卡，有線主播可宜、唐貝詩同唐貝欣兩姊妹、黃浩同老婆徐淑敏（Suki）帶埋三個囡囡、現代美容老闆娘曾裕同老公Francis，仲有電影製作人Sasha Waseem等都係座上客。
貼相晒溫馨
據知齊昕喺花園BBQ，佢貼心搞咗個影相攤位，有埋道具同飾物提供畀賓客攞住嚟影相，玩即影即有，開完P就帶埋張靚相回家留念。壽星女齊昕雖然因為食抗抑鬱藥產生副作用，出現水腫同發胖，但佢前晚都好悉心咁化濃妝戴后冠，着咗條銀色吊帶裙，打扮搶鏡。佢呢次喺禮賓府開P，最安全不過，即使玩到high爆都唔怕畀狗仔隊追訪。
齊昕噚日喺Instagram貼出同父母切餅相晒溫馨，仲留言感謝大家嘅祝福，CY兩公婆都有幫手招呼齊昕嘅朋友。問到唐貝詩送乜嘢畀壽星女，佢話：「我同妹妹送咗我哋公司嘅護膚品同埋首飾做禮物。」
撰文：馮仁昭