今季在港發展的外籍新騎師，暫只得祈普敦一人，呢位22歲澳洲新秀自開鑼日以來，主要為同鄉大摩效力，最叻僅跑過第五名，表現麻麻。不過祈普敦經過兩次賽事熱身後，這天於沙田馬場上陣，甫開場第一場五班1000米，即打開在港勝利之門，佢騎何良馬房「祥勝駿駒」直路賽受惠於排外檔(13檔)起步，結果人馬攜手開齋，單Win及組合獨贏A1分別派64及23元，騎練首度合作亦告擦出火花。
「祥勝駿駒」守好位下大勝三個半馬位，四歲馬取得服役首捷，本身與「崇山寶」同父，後駒7勝直路賽，而「祥勝駿駒」亦是直路賽特佳，在港取1冠1季俱此程。
跑馬經常同人唔同命，年僅22歲的祈普敦開齋，大佢一倍44歲的法國老將杜利萊卻始終開唔到齋，今場佢騎鄭廐「你同我定」不敵「祥勝駿駒」跑第二。三、四名順序為「金飯碗」及「精益旅程」，呢條全洋將四重彩派近一萬四千元。